دوست حصّہ اوّل

آجکل اگر کسی سے پوچھ لیا جائے کہ دوست کون ہوتا ہے تو فوراً سے کچھ ایسے جملے سماعت سے ٹکڑاتے ہیں کہ دوست کے تصور سے بھی اُلجھن محسوس ہونے لگتی ہیں۔ مثلاً  

اس زمانے میں کوئی کسی کا دوست نہیں ہوتا سب مطلب کے ساتھی ہیں۔  

ہر ہاتھ ملانے والا دوست نہیں ہوتا۔

 کون دوست اور کیسی دوستی وقت پرا تو اپنا بنا لیا اور پھر بھول بھال گئے۔

 دوستی کا زمانہ نہیں رہا اب تو لوگ صرف وقت گزاری کے لئے دوست بناتے ہیں۔

 ہاں دوست ہیں نہ میرے بہت سارے ہیں فیس بک پر ہیں،  کالج میں ہیں ، آفس میں ہیں اور محلّے میں بھی تو ہیں ، سب ہی اچھے ہیں۔

 کہیں تو دوستوں کی بھر مار ہیں اور پھر بھی لوگ اپنے آپ کو اُن کے درمیان تنہا محسوس کرتے ہیں اور کہیں دوست ہوتے تو ہیں مگر اُن کے خلوص پر یقین  نہیں ہوتا کہ وہ سچّے دوست ہیں اور ہمیشہ کام آئے گے۔ غرض  جتنے لوگ اتنی باتیں۔ یہ انسانی فطرت ہیں کہ وہ دنیا میں اکیلا نہیں رہ سکتا ہے اُسے ہر لمحہ کسی نہ کسی کے ساتھ کی ضرورت محسوس ہوتی ہے  اور اس تنہائی سے نکلنے کے لئے وہ غیر محسوس طریقے سے نہ چاہتے ہوئے بھی بہت سے لوگوں  کو اپنی زندگی میں شامل کرتا چلا جاتا ہے۔ کتنا ہی تنہائی پسند کیوں نہ ہو کبھی نہ کبھی اُسے کسی ایسے ساتھ کی ضرورت محسوس ہوتی ہے جس سے وہ اپنے دُکھ درد اور خوشیاں بانٹ سکے۔ جسے وہ اپنے تمام رازوں میں شامل کر سکے ۔

دوستی دو یا دو سے زیادہ  لوگوں کے مابین  باہمی رفاقت کا نام ہے جو کسی بھی جزبے کے تحت وقوع پزیر ہوتی ہیں مثلاً محبت، ہمدردی، رحمدلی، شفقت، تجسس،  وفاداری، ایثار،  دردمندی، باہمی افہام و تفہیم، اعتماد  وغیرہ وغیرہ۔  دوستی لوگوں کے درمیان ان تمام جزبات  کی عکاسی کرتی ہیں ۔ انسان جب اس دنیا میں آتا ہے تو سب سے پہلے اپنے گھر والوں سے متعارف ہوتا ہے اور اپنے ارد گرد کے ماحول میں وہ اپنوں کا ساتھ پاتا ہے۔ پہلے والدین ، بھائی بہن  اور پھر جیسے جیسے بچّہ بڑا ہوتا جاتا ہے اس کی زندگی میں رشتہ دار بھی شامل ہوتے ہیں۔ بچّہ سب سے پہلا دوست اپنے گھر میں ہی بناتا ہے اگر تو والدین بچّوں کے ساتھ دوستانہ تعلقات رکھنے کے قائل ہو تو اُن کو پہلا دوست والدین کی صورت میں ہی میسر آتا ہے پھر بھائی بہن ایک دوسرے کے اچھے دوست ہوتے ہیں اور یہ دوستی تاحیات قائم رہتی ہے۔ساتھ ساتھ رشتہ کے بھائی بہنوں سے بھی اچھی دوستی قائم ہوتی ہے۔ لیکن جیسے ہی بچّہ گھر سے نکل کر اسکول میں جاتا ہے وہ اپنے اردگرد نئے لوگوں کو پاتا ہے اور اُن سے متاثر ہوتا  ہے۔ وہ اپنے ہم عمر بچّوں میں زیادہ خوش رہتا ہے اور اُن سے نامحسوس طریقے سے دوستی کرتا چلا جاتا ہے۔ اس عمر میں صرف ایک دوسرے کے ساتھ وقت گزارنا اچھا محسوس ہوتا ہے اور یہ بے غرض اور بے مقصد دوستی ہوتی ہے جو انسان کی نمو میں  نہایت اہم کردار ادا کرتی ہے۔ اس کے ذریعے بچّہ زندگی کے بہت سے آداب سیکھتا ہے جس میں سب سے اہم برداشت اور شراکت ہے۔

وقت گزرنے کے ساتھ انسان کے دوستوں میں اضافہ ہوتا ہے کیونکہ اُس کا حلقہء احباب بڑھتا جاتا ہے۔ اس بڑھتے ہوئے حلقے میں انسان  لوگوں سے اپنے تعلقات میں تفریق کرنا سیکھتا ہے ۔ کون دوست ہے اور کون وقتی اور ضرورتی ساتھی مثلاً  رشتہ دار، پروسی،  اسکول اور کالج کے ساتھی،  آفس میں کام کرنے والے لوگ ،  زندگی میں آنے والے بے شمار لوگ جو کبھی نہ کبھی کسی نہ کسی ضرورت کے تحت ہمارے ساتھ وقت گزارتے ہیں اور جن کی ہمیں اور جن کو ہماری ضرورت پرتی ہے۔ ایسے وقت میں ہم اپنی زندگی میں آنے والے لوگوں کو دوستی اور ساتھی کے ذمرے میں تقسیم کرتے ہیں۔ جو ہمارے بہت قریب ہوتے ہیں اور جن سے ہم اپنے دل کی ہر بات کہہ سکتے ہیں، جو ہمارے اچھے بُرے وقت میں ہمارا ساتھ دیتے ہیں اور جن کی تکلیف ہمیں تکلیف اور خوشی ہمیں خوشی مہیّا کرتی ہے ، جو ہمارے ساتھ نہ ہوتے ہوئے بھی  ہمیں اپنے ساتھ اور قریب محسوس ہوتے ہیں  وہ ہمارے دوستوں میں شامل ہو جاتے ہیں اور باقی لوگ اچھے ساتھی ہوتے ہیں جو وقتی طور پر ہمارے ساتھ تو ہوتے ہیں لیکن جن کے لئے ہمارے دل بے چین نہیں ہوتے ہیں اور ہم اکثر اُن کو بھول بھی جاتے ہیں ۔

دوستوں میں کبھی کوئی ایک ایسا دوست ضرور ہوتا ہے جس کے لئے آپ کا دل مچلتا رہتا ہے اور جس کی جدائی تکلیف دہ ہوتی ہے۔ لیکن دوری  کبھی بھی فاصلہ پیدا کرنے میں کامیاب نہیں ہوتی ہیں اور آپ جب کبھی اس سے ملتے ہیں تو اُسی محبت اور خلوص کے ساتھ ملتے ہیں اور اگر تو ملاقات نہ بھی ہو تو وہ ہمیشہ دل میں دعاؤں کے ساتھ شامل رہتے ہیں۔کچھ لوگ ایسےبھی ہوتے ہیں جو بہت سے دوست بناتے ہیں لیکن کبھی بھی کسی بھی رشتے میں مطمئن نہیں ہوتے ہیں اور دوستوں کو ہمیشہ شک کی نظر سے دیکھتے رہتے ہیں۔ کوئی اُن کے لئے کچھ بھی کر لے انہیں ان کی سچائی کا یقین نہیں آتا اور یہ وہ لوگ ہوتے ہیں جو اپنے آپ سے بھی بدگماں ہوتے ہیں اور یہی بدگمانی اُنہیں کبھی سکون اور چین کا سانس نہیں لینے دیتی۔ وہ مسلسل دوست بناتے ہیں اور اپنی اس فطرت کے باعث اکثر اپنے بہترین دوستوں کو کھو دیتے ہیں۔جبکہ کچھ لوگ دوست تو بڑی مشکل سے بناتے ہیں لیکن اپنی زندگی میں آنے والے تمام لوگوں سے مخلص ہوتے ہیں اور اپنی فطرت کے باعث بہت سے لوگوں کے دلوں میں گھر کر لیتے ہیں۔ ایسے لوگ تنہائی میں بھی کبھی تنہا نہیں ہوتے کیونکہ وہ ہر وقت اپنے اطراف میں موجود لوگوں کےلئے فکر مند رہتے ہیں اور کوشش کرتے ہے کہ اُن کی مدد اور دل جوئی کا کوئی موقع ہاتھ سے نہ جانے دیں۔ ایسے لوگ ہمیشہ خوش رہتے ہیں کیونکہ وہ اپنے آپ پر اعتماد کرتے ہیں اور اپنی ذات سے محبت کرتے ہیں اور یہی محبت اپنی زندگی میں آنے والے ہر فرد کے لئے محبت اور نرمی کا جزبہ دیتی ہے۔

سب سے پہلے اپنے آپ سے دوستی کیجئے کیونکہ اپنے آپ سے دوستی نہ صرف  آپ کے دل میں زندگی سے محبت  پیدا کرتی ہے بلکہ آپ کو اپنی زندگی کا مقصد بھی فراہم کرتی ہیں اور اپنے آپ پر اعتماد بھی قائم ہوتا ہے۔  شک کسی سے بھی نفرت کی پہلی وجہ ہے جو دکھ کا باعث بنتا ہے جب کہ اعتماد محبت کی طرف پہلا قدم ہے جو کسی کو بھی خوشی کشیدنے میں مدد کرتا ہے۔

(جاری ہے)

حصّہ دوئم
حصّہ سوئم
حصّہ چہارم

ثمینہ طارق

جملہ حقوق بحقِ خوشبو کا سفر©محفوظ ہے

ماں

بنیادی طور پر ماں کا لفط ایک ایسی ہستی کے لئے استعمال ہوتا ہے جو ہمیں جنم دیتی ہے۔ ماں کا لفظ چاہےکسی بھی زبان میں کسی بھی طرح ادا کیا جائے اُس میں قدرتی مٹھاس اور محبت کا لمس محسوس کیا جا سکتا ہے۔ جیسےماں ، امّاں ، امّی ، ماما، ممّا ، اُمّی وغیرہ۔ ہر لفط میں شیرینی قدرتی طور پر موجود ہے اور تمام ہی الفاط اسقدر آسانی سے ادا کئے جاسکتے ہیں کہ ایک بچّہ جب بولنا شروع کرتا ہے تو پہلے ماں کو ہی پُکارتا ہے ۔یہ شائد  اس لئے کہ' مم'  صرف ہونٹوں کے جُڑنے سے ہی ادا ہو جاتا ہے اور یہی لفظ بچّے کی ز بان پر سب سے پہلے آتا ہے جو بلآخرممّی یا امّی میں تبدیل ہو جاتا ہے۔

انسان اس دنیا میں قدم رکھنے سے پہلے جس وجود میں سانس لیتا ہے اور جہاں اُس کی جسمانی اور زہنی تشکیل مکمل ہوتی ہے وہ وجود اُس کی ماں کا ہے۔ایک بچّہ اپنی ماں کے شکم سے اسطرح جُڑا ہوتا ہے کہ اُس کے وجود کی گواہی سب سے پہلے اُس کی ماں ہی دیتی ہے اور وہ ہی ایک ایسی ہستی ہے جو اپنے بچّے کو اُس وقت سے ہی محسوس کرتی ہیں جب وہ صرف ایک خلئے کی صورت اُس کے شکم میں ٹہرتا ہے۔ ماں اور بچّے کے وجود ایک دوسرے سے جُڑے ہوتے ہیں اس لئے جب بچّہ اس دُنیا میں آجاتا ہےتب بھی ماں ہی سب سے پہلے اُس کی تکلیف اور خوشی  کو محسوس کر سکتی ہے۔

یوں تو دونوں ہی والدین اپنی جانب سے بچّوں کی پرورش میں مکمل کردار ادا کرتے ہیں لیکن پھر بھی بچّہ قدرتی طور پر ماں کے قریب ہوتا ہے۔آج کے دور میں بے شک بچّوں کو  آیاؤں اورنرسریوں کے حوالے کر دیا جاتا ہو لیکن اس کا مطلب ہرگز یہ نہیں کے بچّہ ماں کے دل سے جدا ہوتا ہے۔ اس دور کی مشکلات کے باعث اکثر مائیں مجبور ہوتی ہے کہ اپنی اولاد کو کسی اور کے حوالے کر کے کام پر جائے مگر وہ ہر لمحہ  اُن کےلئے متفکر رہتی ہیں۔یہ ممکن ہی نہیں کہ ماں اپنے بّچے کی تکلیف کو محسوس نہ کر سکے۔ بچّے چاہے کتنے ہی  بڑے ہو جائے ماں کو وہ ویسے ہی ننھے منے لگتے ہیں جن کو اُنگلی پکڑ کر چلنا سیکھایا، اچھے بُرے کی تمیز سیکھائی ، جن کی بیماری میں رات رات بھر جاگ کر گزاری ۔اسی لئے اکثر مائیں اپنے بچّو ں کو اُس وقت تک ٹوکتی رہتی ہےجب کہ وہ زندگی کے سرد و گرم لمحات میں جینا سیکھ چکے ہوتے ہیں یہاں تک کہ وہ  خود والدین بن چکے ہوتے ہیں۔ ماں ہمیشہ اپنی اولاد کی تکلیف سے خوفزدہ ہ رہتی ہے اور چاہتی ہے کہ اُس کی اولاد کو کوئی تکلیف نہ پہنچے ۔اکثر بچّے ایسی روک ٹوک سے خفا ہوتے ہیں وہ اُس وقت تک اس محبت کو نہیں سمجھ پاتے ہیں جب تک وہ خود والدین نہ بن جائے اور اپنی اولاد کی  محبت میں خود  اسقدر مبتلا نہ ہوجائے۔

ہر بچّے کی طرح میرا تعلق بھی میری ماں سے بہت گہرا تھا۔ ہم تین بھائی بہن ہیں جن میں میں سب سے بڑی ہونے کے ناطے والدین کے بہت قریب رہی اور نہ صرف قریب بلکہ زندگی کے اچھے بُرے تمام معاملات میں اُن کی ہمراز اور مددگار بھی رہی۔ مجھ سے چھوٹی ایک بہن اور اُس سے چھوٹا ایک بھائی ہے۔ اُن دونوں نے بھی  وقت پرنے پر اپنی ذمہ داریاں بخوبی نبھائی اور والدین کا سہارا بنے۔ ہم تینوں بھائی بہنوں میں سے کبھی کسی کو یہ نہ لگا کہ ماں ،بابا کسی ایک سے زیادہ محبت کرتے ہیں یا کسی ایک کو زیادہ توجہ دیتے ہیں ۔ ہمارے والدین نے سب کو اپنی جگہ اہمیت دی اور ایک سی محبت اور شفقت سے نوازا۔ ہم سب بھائی بہن ماں کے زیادہ قریب رہے اور یہ ایک فطری عمل ہے جس کا ذکرمیں اوپر کر چکی ہوں۔ماں کی زندگی میں مجھے کبھی بھی کسی دوست کی ضرورت نہ محسوس ہوئی وہ میری سب سے پہلی اور بہترین دوست تھی۔ زندگی میں کبھی امّی سے کچھ نہیں چھپایا اس کی ضرورت ہی نہ تھی کیونکہ وہی تو تھی جس سے سب کچھ شئیر کرنا اچھا لگتا تھا اور ہر مشکل گھڑی میں وہی راہ دکھاتی اور ہر خوشی میں وہی سب سے زیادہ خوش ہوتی تھی۔  جیسا کہ میں اپنے بلاگ..کوئی تنہا نہیں ہوتا...              میں تحریر کر چکی ہوں :

"میری بہترین دوست صرف میری ماں تھی اور وہ ہمیشہ کہتی تھی کہ بیٹا میں تمہارے  ساتھ ہوں، تم خود کو کبھی تنہا نہیں سمجھنا اور ایسا ہی تھا امی کے ہوتے ہوئے مجھے کبھی کسی دوست کی تمنا نہیں رہی کیونکہ وہ واحد ہستی تھیں جن سے میں نے ہمیشہ بچپن سے لے کر اُس وقت تک جب تک میں خود ماں نہ بن گئی سب کچھ بِلا جھجھک شیئر کیا۔ کوئی دُکھ کوئی خوشی، کوئی پریشانی ایسی نہ تھی جو مجھے امّی سے شیئر کرنے میں جھجھک محسوس ہوتی اور جب امّی کا انتقال ہوا تو اس کے بعد بھی جب میں خود کو تنہا محسوس کرتی تو امی سے باتیں کرتی، گھنٹوں آنکھیں بند کر کے بیٹھی رہتی اور مجھے محسوس ہوتا کہ وہ اب بھی میرے پاس ہیں اور میری ساری باتیں سُن رہی ہیں، مجھے ہمیشہ تسلی رہی کہ میں اکیلی نہیں ہوں۔ اکثر سوچتی ایسا کیوں ہوتا ہے، وہ ساتھ نہ ہوتے ہوئے بھی ہمیشہ میرے ساتھ کیوں ہوتی ہیں۔ آج میری بیٹیاں بھی مجھ سے اتنی ہی قریب ہیں، اور کہتی ہیں 'امی آپ ہماری بیسٹ فرینڈ ہیں۔' تو خیال کی پرواز اس بات کو چھوتی ہے کہ ماں ہی ایسی ہستی ہے جو ہم سے سب سے ذیادہ محبت کرتی ہے شاید اِسی لئے وہ ہماری سب سے اچھی دوست ہوتی ہے اور ہمیشہ اُسکی دعاؤں کا سایہ ہم پر رہتا ہے، ضروری نہیں کہ وہ ظاہر میں بھی ہمارے ساتھ ہوں۔"

میری ماں ایک عظیم ہستی تھی اور صرف میری ہی نہیں ساری مائیں ہی ایسی ہوتی ہیں۔ میری شادی کے فوراً  بعد باباکو کینسر جیسے موزی مرض نے آگھیرا مگر یہ میری ماں کی ہی ہمت اور حوصلہ تھا کہ اُس نہ صرف میرے بابا کی ہمت بندھائے رکھی بلکہ ہم سب بھائی بہنوں کے لئے بھی ایک مضبوط سہارا بن کر رہی۔والد کی وفات کےوقت بھائی بہن بہت چھوٹے ہونے کے باوجود کام کرنے پر مجبور تھے مگر ماں نےکسی لمحے ساتھ نہ چھوڑا  معاشی طور پر بھی اور اخلاقی طور پر بھی وہ ہمیشہ ایک مضبوط سہارے کی صورت سب کے ساتھ کھڑی رہی ۔ سب کو سہارا دیتے اس نے کبھی بھی اپنا کوئی دُکھ درد ہم سےنہ بانٹا ہمیشہ یہی کہتی کہ میں خوش ہوں تم سب کو خوش دیکھ کر۔ میری بیٹیوں میں تو جیسے اُن کی جان تھی۔ بہت لاڈ اور پیار سے رکھا۔ ہمیں خوشیاں بانٹتی ہوئی وہ نہ جانے کب اور کیسے کینسر کا شکار ہو گئی اور بابا کے انتقال کے چار سال بعد ہی ہم سب کو ڈھیر سارے غم دے کر ہم سے جُدا ہوگئی۔

جب وہ بیمار تھی تو ہم سب اُن کے پاس تھے یہ بھی اللہ کا ہم پر کرم رہا کہ اُس نے ہمیں اپنے والدین کی خدمت کا موقع عطا کیا۔ماں سے جدا ہونا ایک عزاب ہی تو لگتا ہے۔ اس کو یقین میں لانا بہت ہی مشکل ہے کہ اب وہ ہستی ہمارے ساتھ نہیں ہے جس کے وجود کا ہم حصہ رہ چکے ہیں اور جو ہماری رگوں میں زندگی بن کر رہتی تھی۔بابا کی وفات کے بعد ماں کا ساتھ تھا ، جب کبھی بابا کی کمی محسوس ہوتی تو ماں کی مسکراہٹ اور اُس کی محبت اطمینانِ قلب کا باعث بنتی۔ لیکن ماں کے بعد صرف ہم تین بہن بھائی ہی ایکدوسرے کے ساتھ رہے۔کبھی کبھی تو یوں لگتا کہ شفقت اور محبت کا تمام تر کوٹا اللہ نے صرف ماں کی ہستی سے جوڑے رکھا تھا جس کے بعد ہمارے سروں سے دعاؤں کا سایہ اُٹھ گیا۔ لیکن جب جب زندگی میں اچھا وقت دیکھا،اپنے بھائی بہنوں کی خوشیاں دیکھی اور پھر اپنے بچّوں کی ترقی اور خوشی دیکھی تو اس کا یقین پختہ ہوگیا کہ ماں کا سایہ دُعاؤں کی صورت ہمیشہ موجود رہتا ہے۔ وہ چاہے ہمارے درمیاں ظاہری طور پر موجود ہو یا نہ ہو ہمیشہ ہمارے ساتھ ہوتی ہے اور اسی کی دُعاؤں کی بدولت ہم اس دینا میں سرخرو ہوتے ہیں۔اس طرح ماں کا وجود خُدا کے قریب لانے میں بھی مدگار بن گیا۔ خدا پر یقین بھی اُس یقین سے جُڑا تھا جو ماں کو خُدا پر تھا اور اسی یقین نے ہم تینوں کو بھی ایک دوسرے سےبھی  جُڑے  رہنے پر مجبور کیا۔ ہم میں سے کسی کی زندگی میں کوئی خوشی کا لمحہ ہو یا دُکھ کا ہم ہمیشہ ساتھ ہوتے ہیں ۔ دنیا داری اور مصروفیت ہمارے دلوں کو جُدا کرنے میں ہمیشہ ناکام رہی ہے اور اس کی وجہ صرف امّی کی محبت ہے جس نے ہم سب کو اپنی دعاؤں کے حصار میں  باندھ رکھا ہے۔

آج ہماری امّی کو ہم سے جُدا ہوئے  ۲۲ سال بیت چُکے ہے لیکن اُن کے ساتھ بیتا ہر لمحہ نظروں میں سمایا ہوا ہے۔ جب کبھی پریشان ہوتی ہوں تو اُن کی خوشبواپنے اردگرد محسوس ہونے لگتی ہے اور آنکھ میں آئے آنسو مسکراہٹ میں تبدیل ہو جاتے ہیں ۔ آج بھی اکشر رات کو نیند میں اپنے ماتھے پر اُن کے ہونٹوں کا لمس محسوس کرکے آنکھ کھل جاتی ہے اور پھر گھنٹوں میں اُن سے باتیں کرتی ہوں۔ کبھی کبھی سوچتی ہوں کہ اس کیفیت میں اگر کوئی مجھے دیکھے تو شاید پاگل ہی سمجھے مگر میرے سب اپنےجانتے ہیں کہ میری ماں جسمانی طور سے میرے ساتھ نہ ہوتے ہوئے بھی میرے پاس ہے اور ہمیشہ رہے گی۔

دعا:

رَبِّ ارْحَمْھُمَا کَمَا رَبَّیٰنِیْ صَغِیْرًا ۾ (بنی اسرائیل۔۲۴)

ترجمہ: اے میرے پروردگار! جس طرح میرے والدین نے مجھے چھوٹے سے کو پالا ہے اور (میرے حال پر رحم کرتے رہے ہیں) اس طرح تو بھی ان پر (اپنا) رحم کر۔ آمین!

بلاگ پڑھنے والے تمام لوگوں سے  اپنےوالدین کی مغفرت کے لئے دعاؤں کی طلبگار

 ثمینہ طارق

جملہ حقوق بحقِ خوشبو کا سفر©محفوظ ہے۔

زندگی (نظم)

کہیں تو!

جزبات سے لبریز لفظ بھی

ان سنے کر دیئے جاتے ہیں

اور کہیں!

ان کہے لفظ سُنائی دے جاتے ہیں

 کہیں تو!

برسوں تک سینچے خواب بھی

بے ثمر قرار پاتے ہیں

اور کہیں!

ان دیکھے خواب تعبیر پا جاتے ہیں

کہیں تو!

میلوں کا سفر طے کرنےپر بھی

راستہ نہیں کٹتا فاصلہ نہیں گھٹتا

اور کہیں!

لمحہ بھر میں لوگ اپنے بن جاتے ہیں

 ثمینہ طارق

جملہ حقوق بحقِ خوشبو کا سفر©محفوظ ہے۔